Pas një jete dhe karriere të bujshme në botën e biznesit larg Kosovës, z. Behgjet Pacolli, që nga viti 2000, i është përkushtuar me shumë vullnet punës për përmirësimin e jetesës në vendlindjen e tij. 

Shumë nga potenciali i tij u vu në interes të Kosovës, duke lobuar në Bruksel dhe Uashington, me kompaninë e tij lobuese "The New Kosovo Alliance" (Aleanca Kosova e Re), kompani kjo e krijuar ekskluzivisht për të lobuar për krijimin e shtetit të Kosovës.

Në këtë rrugëtim, B.Pacolli ka bashkëpunuar me shumë figura të rëndësishme të politikës botërore e sidomos të asaj amerikane, siç janë: Frank Carlucci, Morton Abramovitz, S. Waterman, Zbigniew Brzezinski, Janusz Bugajski, Henry Kissinger, e shumë të tjerë.

Për katër vite ai ishte edhe anëtar i bordit të organizatës CSIS, në komitetin që udhëhiqej nga Henry Kissinger.

Nga aty B.Pacolli arriti që të hap çdo derë që duhej hapur për të ardhur deri te krijimi i kushteve për shpalljen e Kosovës si shtet i pavarur. Misioni lobues i “Kosova New Allience”, nga Pacolli dhe anëtarët tjerë të kësaj organizate u konsiderua i përmbushur në momentin kur presidenti Bush, gjatë vizitës së tij në Tiranë, në qershor të vitit 2007, deklaroi se "Kosova duhet të jetë shtet, republikë e pavarur, tani".

Nga ky moment z. Behgjet Pacolli u kthye në Kosovë.

Me insistimin e disa miqve të tij, kompania e deriatëhershme lobuese, Aleanca Kosova e Re (AKR) ndryshon funksionin e saj dhe shëndërrohet në parti politike.

Në zgjedhjet e vitit 2007, AKR bëhet partia e tretë dhe udhëheq opozitën parlamentare në Kosovë, duke dhënë një kontribut të madh në shpalljen e Kosovës si shtet i pavarur me 17 shkurt 2008. Gjatë kësaj periudhe, edhe pse në opozitë, Behgjet Pacolli vazhdoi të japë kontributin e tij në arritjen e njohjeve ndërkombëtare të shtetësisë së Kosovës.